有咩分別呀 ? 啲人成日就講去廁所坐喺度同企喺度嘅分別喇 ! 但係我就諗緊日常生活, 有好多嘢都唔同㗎 ! 例如啲衫嘅擺法啦…..就算你摺得好好, 你老公, 或者你個仔, 或者你個孫,都係”烏哩單刀”, 搞返亂😰, 變咗一堆 ”嘢” 擺咗喺度. 但係你又會不厭其煩咁攞返出嚟, 再摺返好佢🙄, 呢個咁嘅動作重複, 重複, 再重複😰😰…..
究竟啲男仔點解係鍾意咁㗎呢 ? 我問過我屋企嗰兩位男士, 佢就話 “有咩問題呀？ 我自己搵到咪得囉！” 如果係咁 ….. 點解要有摺衫呢樣嘢呢 ? 其實都唔使買咁多衫啦 ! 你每一件衫或者褲既種類買三件咪得囉😏😏 個數量只可以”三件”！因為驚落雨唔乾吖嘛！你如果著完晾乾咗佢, 直接攞返嚟著咁咪得囉！摺都唔使接喇！👍 咁點解成日咁大堆衫呢 ?
由於我比較 ”大件” (唔用肥呢個字😏 ) , 我買衫嘅時候, 如果試啱咗, 我就會同一款嘅衫買唔同色 (咁當然梗係買深色啦, 因為睇落去瘦啲嘛😆) 咁咪買兩件或者三件, 因為試啱咗就一定啱著, 咁個花唔同個顏色唔同咁咪可以買幾件囉！😬
曾經我有個屋企人同我講 …”你都係得一個”身, 畀你一日出三次街, 早午晚都出去, 你咪最多著三件衫之嘛！咁使乜買咁多衫呀? 唔通你喺屋企一個鐘頭換一次衫呀?”
