借錢畀人

有冇畀人問借錢呀? 咁有冇借過錢畀人呢? 人哋有冇還呢 ? 我就有以下嘅經驗

借錢畀人 : 有個同事問我借一個月人工, 跟住我就話唔出糧咋喎, 你咁快用曬嘅? 跟住佢就話係呀! 因為我屋企有啲急事. 於是我咪借畀佢囉.  佢就同我講話我下個月出糧即刻還畀我. 到咗下個月出糧嘅時候, 過咗兩日, 我就問佢係咪唔記得還錢啦. 嗰個人好惡碌大隻眼望住我話 “還 玩還, 我有錢又唔問你借啦! “ 當其時我都唔知點答佢, 呀到咗第二日佢就還錢畀我啦, 咁我冇出聲, 佢都冇出聲. 点知到咗第三日, 佢又問我借錢喎, 佢問我可唔可以借一個月人工畀佢, 因為佢真係好等錢用, 我同佢講借錢冇問題, 但係我唔想還錢嗰陣時受人氣囉!!!!!

畀人局借錢 : 話說好多年前我哋同成班朋友夜晚有個聚會, 咁有個朋友就話架車攞咗去整, 佢就問我介唔介意同佢一齊去攞車, 因為仲有幾個鐘頭先夠鐘, 於是我哋就搭車入香港仔攞車, 入去攞車嘅時候, 咁要畀錢㗎, 約八千蚊, 喺當其時嘅八千蚊呢就等於我個幾月嘅人工, 咁嗰個人就話佢張卡爆咗, 問可唔可以碌我張卡, 咁我就諗住識咗十幾年, 冇理由唔幫佢㗎…… 我就攞咗我張卡去畀錢. 跟住過咗一個禮拜, 兩個禮拜…..佢都冇心想還錢喎……咁我問佢, 佢就話好忙唔得閒, 搞搞下直情唔見咗呀…….個人搵唔到囉……..而家廿年啦, 嗰個人我諗死咗添……..唔係我咀咒佢, 焗人哋借錢嘅人係咪唔死都冇用呀………………

最近又畀人問借錢 : 有個朋友同突然間夜晚打嚟同我講 “快啲快啲, 過三萬蚊過嚟畀我”, 我問佢做乜我要過三萬蚊畀你呀? 我借咗你錢咩? 佢話趕住救命呀…..(佢父母也過世了, 仲有咩事趕住救命呀?) 佢架車壞咗要整, 已經攞咗去整喇!聽朝要攞三萬蚊去車房找數, 我就話整車要三萬蚊?撞車咩? 佢話個電池有事, 成架車唔喐得!開唔到工,  即係開唔到飯😔, 所以要整車. 我話我突然間攞咁大筆錢出嚟, 我屋企人會問我做咩事㗎? 我問咗屋企人先啦,  我話聽日覆佢, 但佢一路都唔肯收線, 差唔多講咗成個半鐘, 最尾我都係話要同屋企人商量. 我問佢點解你唔問你啲細路同細妹借呀? 佢就話因為之前屋企有啲事同佢哋反曬面唔方便.  收線後, 我就打電話問我妹夫, 佢問佢架咩車呀?  換個電池要比三萬蚊….唔係呀? 我上個月先換左電池, 連工包料幾千蚊咋嘛😊, 你唔好信佢呀. 佢坤你㗎!第日我返公司又問我啲同事, 話整架車嘅電池要幾多錢,  同事同我講佢幫襯開嗰間車房連工包料二千蚊到啦!於是我就覺得原來呢一個人又係嚟呃錢嘅!呢個朋友好奇怪,  識咗三十幾年, 頭嗰幾年一齊做嘢, 跟住之後唔見咗十年, 突然間喺街度撞返, 又好close, 又成日有電話來往, 出去食飯, 跟住又唔見咗幾年, 又搵唔到, 之後又突然間出現返, 神出鬼沒.

屋企人都講得啱嘅…….你借錢畀人, 除非你自己有”閒錢”啦! 你借咗畀人唔好諗住人哋還, . 但係我啲錢真係好辛苦咁一蚊一蚊儲返嚟㗎! 你哋借錢嘅人有冇諗過人哋好辛苦儲返嚟, 畀你借咗你唔還人哋都好慘㗎!!